…Ond härzlech Wellkomme be üs uf de Websiite. Mer send d’Rotseetöftler en Wagebougroppe us Äbike. Üs geds scho set 2014 wo sech de Livio Schmitt ond de Leo Scherer dezue entschede hend zäme ad d’Fasnacht z’goh. Dete hend sie zäme s’erschte mol es Wägeli gmacht. Sie send vo Johr zo Johr gwachse ond es send emmer meh vom Quartier ond au osserhalb dezue cho. So esch die Wagebaugroppe emmer grösser worde ond set 2022 semmer offiziell en Verein. 2024 Hemmer denne döffe üses 10 Johr Jubi fiire, so semmer meteme Glückspilz för die nöchschte Johr, dör d Fasnachtsziit gange. Üse Verein etweckelt sech emmer wiiter ond mer chönd üs emmer grösseri Ziel vornäh. Em Momänt semmer 10 kreativi Mitglieder us ganz Äbike. Mer send vom Alter här en rächt jongi Wagebougroppe. Die jöngschte send 16ni ond de ältischt 22i. Üses Ziel esches met Frued a d’Fasnachts z’goh ond metenand öppsi z’mache.

Mer bruuched üchi Hilf!

Set aafang vo dere Wagebougroppe baschtled mer bem Fabio im Obfalke, i de Garage onde. Die Garage esch offe ond es esch emmer so warm, respektive chalt, wies halt dosse au esch. Das füehrt dezue, dass mer jedes Johr em Herbscht met de Maske mönd inezögle ond de ganz Wage verschiebe, dass alles tröchnet ond mer normal chönd wiiterschaffe. Das alles esch rächt unkonventionell. Drom semmer scho länger uf de Suechi nocheme neue Baschtelort, in Äbike / Omgäbig, wo mer nüt meh mönd verschiebe onds allefalls au chli wärmer esch als dosse. Falls du Platz hesch oder öppis weisch, mäld dech be üs! Falls nüt weisch semmer ned truurig wenns dim Omchreis chasch wiitersäge.

PS: Baschtelrüüm i 3. Stöck obe bringed nüt, de Wage cha ned det ufe…