Hoi
Done lehrsch du d Chöpf vom Verein könne ond wer chli för was zueständig esch. So hemmer amigs a de Fasnacht (meischtens) alles debii 🙂
Fabio Schmitt
«De Fabio esch ned nome üse Präsident, Stichsagi-verpack-profi und hed öppe die es grosses Muul, sondern näbebii au no im Wageteam vo üsem Verein. Met ganz vell Elan suecht är för üs en neue Bastelort, leider weniger als meh erfolgriich. Är haut üs emmer weder met sine Hammer Rede us de Socke, obwohls mängisch chli lang cha goh bes mer bem gwönschte Ponkt vom Kontext achoo send.»
Janis Gunz
«De Janis hed inzwösche nömme so vell Ämtli wie au scho drom hed sech sis Pensum uf Vizepräsi ond Eiachserchef reduziert. Trotzdem helft är emmer no flissig a üsem Wage. Sini Zimmermakönscht sind jedefalls genau so unbestritte wie sini Fähigkeite, zielsicher mit üsem Wage i Polizeiautos zfahre. Jä no Sache passiered, deför heder jetzt s entsprächende Ämtli öbernoh.»
Katrin Hasler (Käti)
«sKäti isch sit 2022 im wagebau, schmeisst sit 2023 zwungenermasse üsi kasse und triibt dete fiinsüberlich alli buesse vo de unzueverlässige mitglieder i. Mit ihrem Gönner*innesystem hed de wagebau chönne wachse, andersch als sie sälber. Sie probiert als Mitglied im Kostümteam usserdem allne mitglieder sNäihe bizbringe – mässig erfolgrich. De unwürdige griift sie glich chräftig unter dArm und näiht sKoschtüm für sie, aber ersch nachere obligatorische pause.»
Leo Scherer
«Eine vo üsne (im Momänt) einzig Autofahrende Mönsche i dem Verein esch de Leo. Ossert Taxidienst hed är a de letschte GV zemlech alles andere wo är bis jetzt gmacht hed (müesse) abgäh. Schad heds met sim zwoit Projekt, de Rotseetöftlerli, ned klappt esch wohl chli zvell verlangt gsi för üses Gröndigsmetglied, s Urgstei. Met stiigender Seniorität stiigt leider ned d‘Entscheidigsqualität – schön hesch dech aber nomol för es wiiters Johr entschede,»
Javier Prieto
«De Javi esch chli üse alleschönner (hed er jedefall s’Gfühl). Aber ehrlich met iisatz im Wage-, Websiite-, Gönner ond Medieteam deckt är en grosse Teil vo üsem Verein ab. Är hed zo jedere Idee ergend öppis z’motze ond ged emmer sini Meinig dezue ab. Er hed es grosses Designer-Talänt ond macht amigs üsi tolle Logos au wener metde Rechtschriibig vo üsem Vereinsname emmer chli müeh hed. Er esch nonig emmer en Fasnächtler gsi aber esch dör üs vor 3 Johr eine worde.»
Anna-Lena Kaufmann
«D’Anna-Lena onterstötzt dTöftler sit 2022. Met meh Hand als Chopf schafft sie unermüedlech a üsne Grende, ond so bättet dTöftler jedes jahr, dass ehre Chopf au onder de Grend inepasst oder allfälligi Ohre richtig hebed. Eigentlech gets gar ned so vell zroaste, dAnna-Lena macht jedi arbet zueverlässig ond ehri kreative idee hend üs scho mehrmals us de scheisse gritte (Grüess a dere Stelle a inzwösche nömme intakti Sonneschirmständer)»
Zara Stirnimann
«D’Stichsagi oder de Akkuschruber send ned de Zara ehri beste frönde, drom esch sie lieber met üsne tolle Grende beschäftigt. Wenn öppis passiert esch sie fotografisch i de erschte Reihe, aber merci, dank der geds au emmer tolli Belder als Erinnerig vom Baschtle oder de Fasi. Zudem hemmer dank ehre sit mehere Johre üsi coole Pins.»
Ria Achermann
«D Ria esch set aafang aa im Medieteam und de grond för tanzendi sticker i üsne Storys. Dank ehre send emmer alli mögleche Gugge i de Storys markiert. Au bi de Kostüm esch die eini vo 3 trägende Händ ond luegt das mer ned uusgsänd als wäremer ine 1-Franke-Lade inegloffe ond so a d Fasnacht gange. Ehres Absolute Lieblingsgetränk send Capri-Sonne wo mer dank allne ohni Fählberächnig losworde send.»
Ivana Circelli
«D Ivana esch im Momänt no Dienstjüngsti ond hed 2023 stolz als Nichtmitglied üsi Nommere am Äbiker treit. Im Medieteam esch d’Ivana nor so zor hälfti vorhande deför hed sies bi de Websiite im Griff (Be no froh hesch keis Seminar för’s iirichte vo Plugins bsuecht) Im Kostümteam hed sie au no Lüüt zom Bekleide das mer ned omelaufed wie die letschte Clowns. Wenn a de Fasnacht met ehre onterwägs besch chasch nor no hoffe das zwoi meter wiit chonsch (ehrlich wie vell lüüt könnsch du?!)»
Dario Cotti
«De Dario esch eine vo üsne alte Hase. Ned nor ziehd är üse Alterschnitt guet chli ufe, au esch är siitem 2019 bi de Rotseetöftler. Siit denne escher (mol meh mol weniger aktiv) bi üs im Verein debii, wobii är au i sinne passive Ziite immer mol weder a Fasnacht be üs am Wage ahzträffe gsi esch (öb das a de Getränk oder a üs liid wössemer ned). Als Musigoberhaupt för d Fasnacht macht är (hoffentlich) en passende Soundtrack wo üs noch de Fasnacht als 3 Wöchige Ohreworm ufe Sack gohd.»