Galerie

Die besti ziit esch scho lang verbii drom gömmer weder zrogg det hii
talahons chömed üs ned id Tüte drom flöchtemer zrogg is alte Ägypte
anstatt baggy jeans ah zha passed mer üs de ziit ah ond wärded zo Anubis ond Kleopatra met de ziitmaschen reised mer weder det hii,
frühner esch doch alles besser gsi.

Recap: D’fasi 2025 hed sech för d’Töftler sehr surreal agfühlt. Sie hend nonie so en strängi ond volli Fasnacht gha. Sie hend s’erschte mol offiziell döffe am Lozärner Omzog teilnäh. Dezue sends au am Adliger, Dieriker ond Äbiker Omzog gsi ond fasch jedi nacht bes zom Morgegraue am Schwaneplatz gstande.

Us de Natur, bewaffnet met Pfiel & Boge, mer folged de Spur, üse Pilz werd zoge. A üsem Jubiläum gömmer ufs ganze, und fiired „10 Johr voll uf Pflanze.“

Recap: Fasi 2024 esch en grosse Erflog gsi. D’Töftler hend chönne ehres 10 Jöhrige Jubiläum fiire (juhuii). Met elf Persone, meh als je, sends zäme a d’Fasnacht uusgröckt. Am Äbiker ond Megger Omzog hends döffe ehre Pilz go Zeige ond sech vell Kompliment aber au en Buess ond e Büüle am Streifewage döfe ihole.

Em Johr Nünzähhundertacht
Esch en Fischer innere fasnächtliche Nacht
Truurig ufem Vierwaldstättersee veronglöckt
Well er hed sech nachem falsche Fesch böckt
Anstatt ere saftige Forälle ofem Tesch
Lit de armi Ma jetzt be de Fesch
Doch jedes Johr wennd Fasnacht esch
Im Verborgene plant er sini Lescht
So dass er im Schatte vom Naue
Die schlächt Luune vo de Fasnächtler cha chlaue
So stigt er uf zom Fritschibronne
Won er vor hondert Johr scho en Orange hed gwonne
Bes zom Güdiszischtig
Wonner weder is Wasser ineschtigt

Recap: Das Johr hend dTöftler ordentlech neuzuewachs becho. Ganzi sebe neui Töftler hends idem Jahr döfe ufnäh! Dezue esch ändlech fertig gsi metem omeschiebe vom Gfährt (oder so hends gmeint). D’Töftler hend ine Eiachser investiert, au wenn dä nonig so zueverlässig gloffe esch ond dTöftler meh als einisch em Stech gloh hed.

Well metem Bauschuum vell Chleider ond Schueh zgrond gange send, send Töftler weder zrogg zom Holz. Das Johr metere neue, sälberbaute Basis – also jetz no stränger zom omefahre. Deför heds das Johr vell Platz für jenschte Scheiss em Wage gha, onder anderem iibauti Bänk ond Stüehl.

Die beshärige holzige Wäge hend dTöftler das Johr hender sech gloh well sie hend de Bauschuum entdeckt. So hends emmerno ofem gliche Wage en grosse Totechopf baut mehrheitlech us Bauschuum. Well dä gspass langsam schwär worde esch heds i dem Johr sogar es Velo gäh, wo de Wage zoge hed – au wenns ned weniger asträngend worde esch dä ide Gägend ome z’stose. E Fahne esch das Johr au denne gläge, schliesslech ghöred dTöftler jetz zo de grosse.

So, gnueg Minecraft für jetz! Mit verstärchig hend dTöftler zFüüfte, emmerno ofem lääre Parkplatz ide iistellhalle, en Wage vo verröckte Professore baschtlet. Das Johr hed sogar es chliises Bett em Wage gha, wo de Leo veli Stonde drenn verbracht het.